Homenaxe a Man de Camelle

No sábado, día 11 de Xaneiro de 2003, a partires das 17:00h, celebrouse na praia do Matadeiro de A Coruña un acto de homenaxe a Man, coñecido como "O alemán de Camelle".

Dito acto foi convocado polo Colectivo Urbano Lugrís, que forma parte da Plataforma Nunca Máis, e consistiu nunha ofrenda floral, recitado de poesías, levantamento dun milladoiro e a intervención dalgún dos asistentes.

As primeiras víctimas do desastre do Prestige foron as nosas praias, rochas, areais, costas ... os homes e mulleres do mar que ven como o seu medio de vida está paseniñamente arruinándose. O noso pobo que está sendo tratado, unha vez máis, e sen rubor algún, con total desprezo polas administracións central e autonómica. O noso medio ambente, a nosa saúde, as nosas aves...

Pero a primeira víctima mortal ten nome; un home que fixo das rochas do seu entorno un auténtico museo, que é un monumento á paz. E que cando este museo - o que adicou toda a súa vida - quedou enchoupado, a súa existencia perdeu sentido. Man, cunha coherencia abraiante, é xa símbolo desta traxedia.

Traxedia que segue sen estar resolta e que cada día que pasa agrávase máis. Por iso parécenos de xusticia esta homenaxe.

¡¡¡ NUNCA MÁIS !!!